jan li wile lape li sona ala
li lon kulupu li toki:
  "mi wile e mani.
  tenpo ali la mi pali.
  mi wile e tenpo.
  mi jo e tenpo la
    mi ken pona tawa jan ante
    li ken lukin e toki awen
    li ken toki
    li ken kama sona.
mi wile e tenpo."

jan li ike li pona.
ona li ike lukin li toki e ni:
"jan ante li pakala e mi li ike tawa mi. ali li ike.
mi wile ala e ni. mi wile tawa tan ma ni."

jan li suli.
ona li sama ala soweli.
  tenpo pini la jan li wile e moku taso.
  tenpo ni la jan li wile e ijo mute.
jan li wile e nasin sewi
  li wile sona
  li pana e kalama musi
  li toki musi
  li wile.

jan li ken lukin li ken kute li ken moku.
taso jan li wile mute mute e ijo sewi.
jan li pali li moku. jan li ken la ona li sewi.
  moku en moli li ken ala ante e sewi.
jan li wile sewi.
  jan ike li wile pakala e wile ni.
  taso jan li wile kin.

jan li sona
e telo laso
e kon wawa.
jan li lon ma. ma li pona tawa jan.
  jan ma li ken lape li ken wile.

jan li ken ante mute.
ma li ken ante mute kin.
kon li kama tan telo. telo li kama anpa tan kon sewi.
suno li tawa. mun li kama.

suno loje sewi a.
jan li lon.
jan li ken pona.

jan ike li ken ala ike e jan ali.
wawa. tenpo. toki ala. a...
jan ali li wile.

jan li lon pimeja li pilin ike mute li tawa
li lukin e mun sewi pona.
jan li wile.
  "mi tawa seme? seme li kama?"

 
[This poem is inspired by Carl Sandburg's poem 107 (also known as "The People Will Live On") from his book The People, Yes.]